August 2017 ~ tipstalked

ដើមឈើដុះខុសទំនងស្ទើរមិនគួរឱ្យជឿ តែប្លែកភ្នែកម្យ៉ាងដែរ !!!

ដើមឈើខ្លះពិបាកនឹងថែទាំណាស់ បន្ទាប់ពីយើងទើបតែដាំវាថ្មី ដោយត្រូវការឱ្យស្រោចទឹកជាប្រចាំ ទម្រាំតែវាដុះចាក់ឫស។ ប៉ុន្តែសម្រាប់ដើមឈើខ្លះងាយនឹងដុះណាស់។ ខ្លះដុះដោយឯកឯង ហើយទោះបីគ្មាន ការថែទាំ និងស្ថិតក្នុងបរិយាកាសបែបណាក៏វានៅតែឈរយ៉ាងរឹងមាំ។

ជាក់ស្តែង រូបភាពដ៏អស្ចារ្យទាំងនេះដែលគេបង្ហោះតាមបណ្តាញទំនាក់ទំនងសង្គម Reddit និង Bored Panda បង្ហាញពីដើមឈើដុះខុសទំនងស្ទើរមិនគួរឱ្យជឿ។

ទីតាំងដើមឈើទាំងនេះ ស្ថិតនៅភូមិសាស្ត្រខុសៗគ្នាជុំវិញពិភពលោកហើយវាទទួលបានការចាប់អារម្មណ៍ យ៉ាងខ្លាំង។

ប្រភព៖ raksmeinews.com

ភេសជ្ជៈប៉ូវកម្លាំងមានផលប៉ះពាល់ដល់សុខភាពធ្ងន់ធ្ងរនឹកស្មានមិនដល់

ចំណេះដឹង No comments

ជារៀងរាល់ថ្ងៃមនុស្សភាគច្រើនចូលចិត្តផឹកភេសជ្ជៈប៉ូវកម្លាំង ដោយមិនបានដឹងពីភាពប្រឈមមុខទៅនឹងផលប៉ះពាល់ជាច្រើននៃសារធាតុអាល់កុល និងសាធាតុញៀនដែលមានក្នុងពួកវាទាំងនោះទេ។ នេះជាការអះអាងនៃការសិក្សាស្រាវជ្រាវរបស់សាកលវិទ្យាល័យម៉ារីលែនដែលបានចេញផ្សាយនៅដើមខែនេះ។

អត្រានៃមនុស្សដែលយល់ដឹងពីគ្រោះថ្នាក់និងការគំរាមគំហែងសុខភាពមានការកើនឡើងស្របពេលដែលចំនួនអ្នកពិសាភេសជ្ជៈប៉ូវកម្លាំងកាន់តែកើនឡើងជាប្រចាំ ។ អង្គការសុខភាពពិភពលោកបាននិយាយនៅក្នុងរបាយការណ៍ឆ្នាំ 2014 ថា "ការបង្កើនការទទួលទានភេសជ្ជៈប៉ូវកម្លាំងអាចបង្កគ្រោះថ្នាក់ដល់សុខភាពសាធារណៈជាពិសេសក្នុងចំណោមយុវវ័យ" ។

កាលពីដើមឆ្នាំនេះក្មេងអាយុ 16 ឆ្នាំនៅសហរដ្ឋអាមេរិកម្នាក់បានស្លាប់ដោយសារតែបានផឹកភេសជ្ជៈប៉ូវកម្លាំង និងភេសជ្ជៈដែលមានជាតិកាហ្វេអ៊ីនហួសកម្រិត។

ការសិក្សាថ្មីមួយដោយអ្នកស្រាវជ្រាវនៅមជ្ឈមណ្ឌលសុខភាពវ័យក្មេងនិងអភិវឌ្ឍន៍នៅសាកលវិទ្យាល័យ Maryland បានបង្ហាញពីការរកឃើញអវិជ្ជមានមួយទៀតអំពីភេសជ្ជៈដែលកំពុងតែមានការពេញនិយមខ្លាំងក្នុងចំណោមយុវវ័យ។
អ្នកស្រាវជ្រាវបានអះអាងថាមិនត្រឹមតែភេសជ្ជៈមិនល្អចំពោះសុខភាពរបស់អ្នកនោះទេប៉ុន្តែមនុស្សវ័យក្មេងដែលជាអ្នកផឹកភេសជ្ជៈទាំងអស់នោះជាប្រចាំ គឺឆាប់ទទួលយកការផឹកស្រានិងគ្រឿងញៀនកាន់តែច្រើននៅថ្ងៃខាងមុខ។ ការស្រាវជ្រាវនេះត្រូវបានចេញផ្សាយនៅក្នុងកាសែត Drug and Alcohol Dependence ។

អ្នកស្រាវជ្រាវបានឃ្លាំមើលនិស្សិតចំនួន 1.100 នាក់អស់រយៈពេលបួនឆ្នាំនិងការប្រើប្រាស់ភេសជ្ជៈប៉ូវកម្លាំងរបស់ពួកគេក្នុងមួយឆ្នាំៗ ។ អ្នកចូលរួម 51,4 ភាគរយជាអ្នកប្រើភេសជ្ជៈប៉ូវកំលាំងញឹកញាប់ហើយ 20,6 ភាគរយជាអ្នកមិនផឹកភេសជ្ជៈគ្រប់ប្រភេទ។ 17,4 ភាគរយជាអ្នកផឹកកម្រិតមធ្យមខណៈ 10,4 ភាគរយបានប្រើប្រាស់បរិមាណតិចតួចដែលថយចុះជារៀងរាល់ឆ្នាំនៃការសិក្សា។
ការសន្និដ្ឋានមួយដែលអ្នកស្រាវជ្រាវបានធ្វើគឺថាមនុស្សវ័យក្មេងដែលបានផឹកភេសជ្ជៈប៉ូវកម្លាំងច្រើនពេកមានហានិភ័យខ្ពស់នៃការប៉ះពាល់ប្រព័ន្ធរំញោចកណ្តាល និងប្រើសារធាតុញៀនច្រើន។ នេះអាចបង្ហាញថាភេសជ្ជៈប៉ូវកម្លាំងអាចត្រូវបានព្យាបាលដូចជាថ្នាំជក់និងគ្រឿងស្រវឹងនាពេលអនាគត។

ការស្រាវជ្រាវក៏បានបង្ហាញផងដែរថាបញ្ហាបេះដូងត្រូវបានផ្សារភ្ជាប់យ៉ាងខ្លាំងជាមួយនឹងភេសជ្ជៈដែលមានជាតិកាហ្វេអ៊ីនខ្ពស់។ នេះបើយោងតាមទស្សនាវដ្តី Canadian Journal of Cardiology។

ប្រភព៖ newsner.com
កែសម្រួលដោយ៖ Chea Eric

បឹងទាំង១០ ដែលមានគ្រោះថ្នាក់ជាងគេបំផុត នៅលើផែនដី

ប្លែកៗ No comments

បឹងគឺជាប្រភពទឹកមួយអាចផ្តល់ប្រយោជន៍ជាច្រើនដល់មនុស្ស មិនថាសម្រាប់ប្រើប្រាស់ ឬរកត្រីសម្រាប់ហូបជាដើម -ល-។ ជាធម្មតាបឹងមានទឹកល្អ និងមានភាពស្ងប់ស្ងាត់ណាស់ ព្រោះវាគ្មានផ្លូវទឹកសម្រាប់ចេញចូលនោះទេ ប៉ុន្តែនៅលើសកលលោកនេះមានបឹងមួយចំនួន អាចធ្វើឲ្យអ្នកមានគ្រោះថ្នាក់ដល់អាយុជីវិតបានផងដែរ។
ខាងក្រោមនេះគឺជាបឹងដែលមានគ្រោះថ្នាក់ជាងគេនៅក្នុងពិភពលោក គិតចាប់ពីចំណាត់ថ្នាក់ទី១០ រហូតដល់ទី១៖

១០. បឹង Brosno (ប្រទេសរុស្ស៊ី)

អ្នកដែលរស់នៅក្នុងតំបន់នេះតែងតែបានឃើញសត្វចម្លែកម្យ៉ាងក្នុងបឹង Brosno។ អ្នកវិទ្យាសាស្ដ្របានព្យាយាមរកសត្វសម្លែកនោះ ប៉ុន្តែមិនបានទទួលលទ្ធផលអ្វីឡើយ។ ទឹកក្នុងបឹងនេះបានធ្វើឲ្យមនុស្សយល់ថា មានសត្វចម្លែករស់នៅផងដែរ។

៩. បឹង Hillier (ប្រទេសអូស្ត្រាលី)

ទឹកនៅក្នុងបឹង Hillier មានពណ៌ផ្កាឈូកពណ៌ដែលមើលទៅគួរឲ្យខ្លាចញញើតមែនទែន។អ្នកវិទ្យាសាស្ត្របានពន្យល់ថា ទឹកក្នុងបឹងនេះមានពណ៌ផ្កាឈូកគឺមកពីបាក់តេរី ឬក៏វីរុសដែលមាននៅក្នុងទឹកនោះ។

៨. បឹង Kawah Ijen (ប្រទេសឥណ្ឌូនេស៊ី)

បឹងមួយនេះគឺជាបឹងដែលមានជាតិអាស៊ីតច្រើនបំផុតនៅលើពិភពលោក។ ទឹកនៅក្នុងបឹងនេះមានពណ៌ខៀវបៃតងស្រាល ហើយនៅបាតបឹងមានកម្ដៅដល់ទៅ ២០០អង្សាសេ និងពោរពេញទៅដោយឧស្ម័នមេតានដែលមានគ្រោះថ្នាក់យ៉ាងខ្លាំងទៀតផង។

៧. បឹង Gafsa (ប្រទេសទុយនេស៊ី)

វាគឺជាបឹងដែលចម្លែកបំផុតព្រោះវាបានផុសឡើងដោយឯងៗនៅកណ្តាលវាលខ្សាច់មួយ។ អ្នកវិទ្យាសាស្ដ្រជឿថា បឹងនេះបានលេចឡើងដោយសារការរញ្ជួយផែនដី។ ទឹកនៅក្នុងបឹងនេះមានសារាយដែលពុល និងវិទ្យុសកម្មទៀតផង។

៦. បឹងទឹកពុះ (សាធារណរដ្ឋដូមីនិក)

បឹងនេះមានទឹកដែលកំពុងពុះជាប្រចាំតែម្ដង។ ទឹកក្នុងបឹងនេះមានសីតុណ្ហភាព ៩២អង្សាសេ។ គេបានហាមឃាត់ដាច់ខាតមិនឲ្យធ្វើការហែលទឹកនៅក្នុងបឹងនេះព្រោះវាអាចធ្វើឲ្យអ្នកឆ្អិនទាំងរស់។ អ្នកវិទ្យាសាស្រ្តបានពន្យល់ថា បឹងនេះស្ថិតនៅក្នុងរណ្តៅភ្នំភ្លើងមួយដូច្នេះហើយបានជាវាមានការពុះឥតឈប់ឈរបែបនេះ។

៥. បឹង Nyos (ប្រទេសកាមេរ៉ូន)

នៅថ្ងៃទី២១ ខែសីហាឆ្នាំ ១៩៨៥ មានពពកមួយដែលពោរពេញទៅដោយឧស្ម័នបានលេចឡើងជុំវិញបឹង Nyos នេះ ដោយបានសម្លាប់មនុស្សសរុបចំនួន ១ ៧៤៦នាក់និងសត្វនៅម្ដុំនោះមួយចំនួនផងដែរ។ អ្នកវិទ្យាសាស្ដ្របាននិយាយថា ពពកនេះបានកើតឡើងដោយសារភ្នំភ្លើងនៅបាតសមុទ្រ ធ្វើឲ្យជាតិកាបូនឌីអុកស៊ីតបានចូលរួមជាមួយទឹក ដើម្បីបម្លែងខ្លួនទៅជាពពកដែលមានគ្រោះថ្នាក់នេះឡើង។

៤. បឹង Michigan (សហរដ្ឋអាមេរិក)

វាជាបឹងទេសភាពដែលទាក់ទាញយ៉ាងខ្លាំង។ ទឹកក្នុងបឹងនេះមានពណ៌ស្រស់ស្អាតនិងគ្មានសត្វចម្លែក ឬសារជាតិគ្រោះថ្នាក់អ្វីឡើយ។ ប៉ុន្តែអ្វីដែលធ្វើឲ្យបឹងនេះមានគ្រោះថ្នាក់ដោយសារទឹកនៅក្នុងបឹងនេះមានកម្លាំងយ៉ាងខ្លាំង ដែលអាចធ្វើឲ្យអ្នកហែលទឹករសាត់ទៅកាន់តែឆ្ងាយពីច្រាំង ហើយបឹងនេះក៏មានរលកធំៗប្រៀបដូចសមុទ្រអ៊ីចឹងផងដែរ។

៣. បឹងឆ្អឹងខ្មោច (ភ្នំហិម៉ាឡៃយ៉ា)

មានមនុស្សចំនួន ២០០នាក់បានស្លាប់ដោយអាថ៌កំបាំង។ សាកសព្ទាំងនោះត្រូវបានរកឃើញដោយកងទ័ពអង់គ្លេសក្នុងឆ្នាំ ១៩៤២។ ការហែលទឹកក្នុងបឹងនេះត្រូវបានហាមឃាត់ ព្រោះថាអាថ៌កំបាំងនៃការស្លាប់ដ៏ច្រើននោះ នៅមិនទាន់បានបកស្រាយនៅឡើយ។

២. បឹង Kivu (នៅចន្លោះសាធារណរដ្ឋកុងហ្គោនិងរ្វ៉ាន់ដា)

បឹង Kivu គឺជាបឹងមួយដែលមានគ្រោះថ្នាក់ខ្លាំងណាស់។ បើសិនជាមានការផ្ទុះភ្នំភ្លើង ឬក៏រញ្ជួយផែនដីនឹងធ្វើឲ្យបឹងនេះផ្ទុះបាន ព្រោះបឹងនេះមានជាតិកាបូនឌីអុកស៊ីតនិងបរិមាណម៉េតានយ៉ាងច្រើននៅក្នុងទឹក។

១. បឹង Natron (ប្រទេសតង់ហ្សានី)

បឹង Natron គឺជាបឹងដែលមានគ្រោះថ្នាក់បំផុតនៅលើពិភពលោក។ បឹងមានសារជាតិចម្លែកមួយដែលនឹងធ្វើឲ្យសត្វដែលស្លាប់ក្លាយទៅជារូបចម្លាក់ថ្មតែម្តង។ អ្នកវិទ្យាសាស្រ្តបានពន្យល់ថា បឹងនេះពោរពេញទៅដោយជាតិអ៊ីដ្រូសែននិងសារជាតិអាល់កាឡាំងដែលធ្វើឲ្យសាកសពសត្វដែលងាប់មិនរលួយឡើយ។

ប្រភព៖ khmerload

ចេញហើយ! លទ្ធផលនៃការចាប់ពូលពានទ្វីបអឺរ៉ុបដ៏ធំ UEFA Champions League

កីឡា No comments

ការចាប់ឆ្នោតរើសពូលការប្រកួត UEFA Champions League បានធ្វើរួចរាល់ហើយនៅមុននេះបន្តិច នាទីក្រុងម៉ូណាកូ។ ក្រុមទាំង៣២ត្រូវបានបែងចែកទៅជា៨ពូលពី A ដល់ H ដោយក្នុងនោះមួយពូលមានចំនួន ៤ក្រុម។ ក្រុមដែលមកពីលីគនៃប្រទេសតែមួយនឹងមិនប៉ះគ្នានោះទេនៅវគ្គនេះ។ លទ្ធផលនៃការចាប់ពូលមានដូចតទៅ:

ពូល A: Benfica (POR), Man. United (ENG), Basel (SUI), CSKA Moskva (RUS)
ពូល B: Bayern (GER), Paris (FRA), Anderlecht (BEL), Celtic (SCO)
ពូល C: Chelsea (ENG), Atlético (ESP), Roma (ITA), Qarabağ (AZE)
ពូល D: Juventus (ITA), Barcelona (ESP), Olympiacos (GRE), Sporting CP (POR)
ពូល E: Spartak Moskva (RUS), Sevilla (ESP), Liverpool (ENG), Maribor (SVN)
ពូល F: Shakhtar Donetsk (UKR), Man. City (ENG), Napoli (ITA), Feyenoord (NED)
ពូល G: Monaco (FRA), Porto (POR), Beşiktaş (TUR), Leipzig (GER)
ពូល H: Real Madrid (ESP), Dortmund (GER), Tottenham (ENG), APOEL (CYP)៕

ប្រភព៖ sabay

Zlatan Ibrahimovic ចុះកុងត្រាថ្មីជាមួយ Manchester United ហើយ

កីឡា No comments

ក្លឹបបិសាចក្រហម Manchester United កាលពីអម្បាញ់មិញនេះបានប្រកាសពីការចុះកុងត្រាថ្មីជាផ្លូវការជាមួយខ្សែប្រយុទ្ធចាស់វស្សា Zlatan Ibrahimovic។ កុងត្រានេះមានរយៈពេលមួយឆ្នាំ ហើយកីឡាករសញ្ជាតិស៊ុយអែតវ័យ ៣៥ឆ្នាំរូបនេះនឹងពាក់អាវលេខ ១០ ក្នុងរដូវកាលថ្មីនេះ។

អ្នកចាត់ការទូទៅរបស់ក្លឹបបិសាចក្រហម លោក Jose Mourinho បានថ្លែងក្នុងគេហទំព័រផ្លូវការរបស់ក្លឹបថា៖ "យើងសប្បាយចិត្តណាស់ដែល Zlatan កំពុងតែជាសះស្បើយពីរបួស ហើយយើងក៏សប្បាយចិត្តទៅនឹងមហិច្ឆតា និងបទពិសោធន៍របស់គេ ដែលផ្ដល់មកឲ្យពួកយើង។ បន្ទាប់ពីការលេងរបស់គេកាលពីរដូវកាលមុន គេសមនឹងទទួលបានការជឿទុកចិត្តពីពួកយើង ហើយពួកយើងនឹងរង់ចាំដោយអំណត់សម្រាប់ការត្រលប់ពីរបួសរបស់គេ"។ បុរសសញ្ជាតិព័រទុយហ្គាល់បានបន្តទៀតថា៖ "ខ្ញុំជឿថាគេនឹងសំខាន់សម្រាប់យើង ក្នុងផ្នែកទី២នៃរដូវកាលនេះ"។ ចំណែកឯ Zlatan វិញមានចំណាប់អារម្មណ៍ថាខ្លួនត្រលប់មកបញ្ចប់អ្វីដែលខ្លួនបានចាប់ផ្ដើម។ កីឡាកររូបនេះក៏បានបង្ហាញពីការបន្តខិតខំប្រឹងប្រែងព្យាបាលរបួសរបស់ខ្លួនដើម្បីត្រលប់មកលេងឲ្យក្លឹបវិញ។ ខ្សែប្រយុទ្ធរូបនេះក៏បានបញ្ជាក់ថាខ្លួនគ្មានបំណងចាកចេញពីក្លឹបទេនារដូវកាលនេះ ដោយនិយាយថា៖ "វាគឺជាការសម្រេចចិត្តរបស់ខ្ញុំ ក៏ដូចជាក្លឹបផងដែរ ដែលបន្តឲ្យខ្ញុំនៅលេងឲ្យក្លឹបបន្តទៀត"។

ខ្សែប្រយុទ្ធ Zlatan Ibrahimovic បានស៊ុតបញ្ចូលទីឲ្យក្លឹបបិសាចក្រហមបានចំនួន ២៨គ្រាប់ក្នុងការបង្ហាញខ្លួន ៤៦លើក កាលពីរដូវកាលមុន មុននឹងរងរបួសជង្គង់ធ្ងន់ធ្ងរកាលពីខែមេសា។ ក្លឹបជើងឯកលីគកំពូលអង់គ្លេស ២០សម័យមួយនេះ កាលពីខែមិថុនា មិនបានផ្ដល់កុងត្រាថ្មីឲ្យកីឡាកររូបនេះឡើយដោយយោងលើភាពធ្ងន់ធ្ងរនៃរបួស ប៉ុន្តែដោយដំណើរការជាសះស្បើយបានប្រព្រឹត្តទៅយ៉ាងល្អ ដែលអាចធ្វើឲ្យខ្សែប្រយុទ្ធចាស់វស្សារូបនេះអាចត្រលប់មុនពេលកំណត់ ជាហេតុធ្វើក្លឹបសម្រេចផ្ដល់កុងត្រាថ្មីតែម្ដង៕

ប្រភព៖ sabay

Neymar ស៊ុត ១ Assist ១ ជួយ Paris ឈ្នះ ៣-០

កីឡា No comments

Neymar រកបានមួយគ្រាប់ក្នុងការប្រកួត French ligue 1លើកដំបូងរបស់ខ្លួនឲ្យក្រុម Paris St-Germain។

ការប្រកួតសប្ដាហ៍ទីពីរទល់នឹងម្ចាស់ផ្ទះ Guingamp ក្រុមអ្នកមានបារាំង នៅក្នុងវគ្គទីមួយមិនអាចរកគ្រាប់បាល់ចូលទីបានទេ ទើបតែនាទី៥២ក្នុងវគ្គទីពីរ ខ្សែការពារ Jordan Ikoko បានភ្លាត់ស្នៀតទាត់ចូលទីខ្លួនឯង ធ្វើឲ្យ Paris នាំមុខ១-០។
រំលងបាន១០នាទីគឺនាទី៦២ Neymar បានបញ្ជូនបាល់យ៉ាងល្អឥតខ្ចោះពីពាក់កណ្ដាលតារាងឲ្យ Cavani ដាច់មួយស្មើជាមួយអ្នកចាំទីហើយស៊ុតសម្រេចគ្រាប់ទីពីរស្រួលៗ។ នៅសល់ប្រហែល៨នាទីមុនចប់ការប្រកួត Cavani បានបញ្ជូនបាល់ឲ្យ Neymar ស៊ុតបានមួយគ្រាប់វិញធ្វើឲ្យចប់ការប្រកួត Paris បានយកឈ្នះ Guingamp ៣-០៕

ប្រភព៖ sabay

វិធីធម្មជាតិ ដើម្បីបំបាត់ក្លៀកខ្មៅ

ចំណេះដឹង No comments

ក្លៀកខ្មៅ អាចធ្វើឱ្យអ្នកខ្មាស់អៀនមិនហ៊ានពាក់អាវវៀរក្លៀក អៀម ព្រោះខ្លាចគេឃើញ។ ខាងក្រោមនេះយើងសូមណែនាំមិត្ដនារទីទាំងអស់គ្នានូវវិធីធម្មជាតិមួយចំនួនដើម្បីឱ្យក្លៀកស។

ផ្លែប៉ោម៖ ប្រសិនអ្នកខាត់ស្បែករបស់ជាមួយនឹងផ្លែប៉ោមកិនម៉ត់ វាអាចបំបាត់នូវស្នាមខ្មៅ និងក្លិនមិនល្អនៅពីក្លៀករបស់អ្នក។ ផ្លែប៉ោមមានផ្ទុកនូវសារធាតុ AHA ដែលមានសមត្ថភាពសម្លាប់មេរោគ និងបាក់តេរី ដែលបណ្ដាលឱ្យក្លៀកខ្មៅ។

សម្បកក្រូចពោធិ៍សាត់៖ សម្បកក្រូចពោធិ៍សាត់មានផ្ទុកអាស៊ីដស៊ីទ្រីក ដែលត្រូវបានគេប្រើប្រាស់ដើម្បីខាត់ស្បែកឱ្យស។ សូមយកសម្បកក្រូចពោធិ៍ទៅហាលរហូតដល់វាស្ងួត។ បន្ទាប់មកយកសម្បកក្រូចនេះប្រមាណពីរស្លាបព្រាបាយទៅលាយជាមួយនឹងទឹកផ្កាកុលាប(Rose Water) ហើយលាបត្រង់ក្លៀកនោះ។ ទុកវាឱ្យបាន ១០នាទី ហើយលាងជម្រះវាដោយទឹកត្រជាក់។

ប្រេងដូង៖ ប្រេងដូង ត្រូវបានគេប្រើជាសកលសម្រាប់ព្យាបាលថែសម្ផស្ស។ ប្រើវិធីព្យាបាលនេះ ធ្វើឱ្យស្បែករបស់អ្នកសបន្ដិចម្ដងៗ។ សូមធ្វើការម៉ាស្សាក្លៀករបស់អ្នកដោយប្រេងដូងឱ្យបាន ១០ ទៅ ១៥នាទីមុនពេលងូតទឹក។

ក្រូចឆ្មារ៖ ក្រូចឆ្មារត្រូវបានមនុស្សដឹងថា វាជាភ្នាក់ងារខាត់ស្បែកឱ្យសតាមបែបធម្មជាតិ។ ប្រសិនបើអ្នកយកក្រូចឆ្មារខាត់ត្រង់ក្លៀករបស់អ្នក វាងនឹងជួយឱ្យស្បែករបស់អ្នកស។ សូមកុំភ្លេចលាបក្រែមផ្ដល់សំណើម ឬឡូសិនត្រង់ក្លៀករបស់អ្នកក្រោយពេលជម្រះវាស្អាតហើយនោះ។ ម្យ៉ាងទៀតក្រូចឆ្មារនេះគឺជាភ្នាក់ងារសម្លាប់មេរោគ ដែលជួយបំបាត់ក្លិនអាក្រក់ពីក្លៀករបស់អ្នក។

ទឹកដោះគោ៖ ទឹកដោះគោមានប្រសិទ្ធភាពធ្វើឱ្យស្បែកស។ ទឹកដោះគោមានផ្ទុកនូវវីតាមីន និងអាស៊ីដខ្លាញ់មួយចំនួន ដែលធ្វើឱ្យស្បែកស និងមានសុខភាពល្អ។ សូមអ្នកយកទឹកដោះគោទៅលាបត្រង់ក្លៀករបស់អ្នកឱ្យបានម្ដងក្នុងមួយថ្ងៃ ហើយទុកវាឱ្យបាន ១៥នាទីមុនពេលលាងជម្រះវាដោយទឹកត្រជាក់។

ត្រសក់៖ ធ្វើឱ្យក្លៀករបស់អ្នកសដោយការយកចំណិតត្រសក់ទៅខាត់ត្រង់កន្លែងខ្មៅនោះ។ ការខាត់នេះនឹងធ្វើឱ្យស្បែករបស់អ្នកស និងជួយឱ្យវាមានសំណើមបានយូរ ៕

ប្រភព៖ camnews

ស្តេចដែលមានជាងគេលើពិភពលោក ហើយអ្នកមានបច្ចុប្បន្នមិនស្មើ

ចំណេះដឹង No comments

ស្តេចអាហ្រ្វិកព្រះនាម Musa Keita I ត្រូវបានគេចាត់ទុកថា ជាអ្នកមានបំផុត គ្រប់ពេលវេលា នៅពេលដែលទ្រព្យសម្បត្តិរបស់ព្រះអង្គ ត្រូវបានគេនិយាយថា «មិនអាចបរិយាយបាននោះ» ។
ស្តេច Musa Keita I បានឡើងគ្រងរាជ នៅឆ្នាំ១៣១២ ពេលដែលព្រះអង្គ បានក្លាយជាអធិរាជ Mansa ដែលប្រែថា ស្តេច ។ នៅពេលនោះ ភាគច្រើននៅទ្វីបអឺរ៉ុប នៅតែងងឹត នឹងស្ថិត ក្រោមសង្គ្រាម ខណៈដែល អាណាចក្រអាហ្វ្រិក បានលូតលាស់ ជាលំដាប់។
ស្តេច Musa Keita I បានគ្រប់គ្រងចក្រភពម៉ាលី នៅសតវត្សទី១៤ ក្នុងនោះ គ្រប់ដណ្តប់ទាំងទឹកដី ដែលមាន ទាំងប្រទេស ហ្កាណា Timbuktu និង Mali ដែលមានផ្ទៃដីប្រហែល ២០០ម៉ាយល៍។
ទស្សនាវដ្តី Time បានចុះអត្ថបទដែលសរសេរដោយលោក Jacob Davidson ថា គ្មានពាក្យណាមួយ អាចបង្ហាញពីទ្រពសម្បត្តិ ដ៏មហិមារ របស់ស្តេចអង្គនេះ បានទេ ។ តែបើតាមការប៉ាន់ស្មាន ទ្រព្យសម្បត្តិស្តេចអង្គនោះ គិតត្រឹមឆ្នាំ២០១៦ មានចំនួន ៤០០ ពាន់លានដុល្លារអាម៉េរិក ដែលជាកំពូលអ្នកមាន នាពេលបច្ចុប្បន្ន ដែលចុះផ្សាយដោយ Forbes នោះ។
អ្វីដែលធ្វើអោយស្តេចខាងលើបានក្លាយជាអ្នកមាន បំផុតនៅពេលនោះ គឺភាគច្រើនបានមកពីធនធានធម្មជាតិ ក្នុងនោះមានអំបិល និងមាស ។ ជាក់ស្តែង អាហ្វ្រិកខាងលិច ជាអ្នកផ្គត់ផ្គង់អំបិល និងមាស ជាងពាក់កណ្តាល នៃការផ្គត់ផ្គង់ ទៅកាន់ពិភពលោក ៕

ប្រភព៖ dailyreport

ត្រដក់ធំជិតផុតពូជនៅលើសកលលោកញាស់១៧៥សម្បុក ក្នុងខេត្ដបាត់ដំបង

ព័ត៌មាន No comments

យោងតាមទីភ្នាក់ងារសារព័ត៌មានជាតិ AKP ចុះផ្សាយនៅថ្ងៃទី ២៧ ខែកក្កដា ឆ្នាំ២០១៧ ឲ្យដឹងថា កូនសត្វត្រដក់ធំដែលជាប្រភេទរងគ្រោះជិតផុត ពូជនៅលើសកលលោក បាន ញាស់ ដោយជោគជ័យចេញពីសម្បុកចំនួន១៧៥ ស្ថិតនៅក្នុងតំបន់រ៉ាមសារ ព្រែកទាល់ ស្រុកឯកភ្នំខេត្ដបាត់ដំបង និងបានចាកចេញពីសម្បុកទៅកាន់ទីជម្រកធម្មជាតិនានា នៅក្នុងប្រទេសកម្ពុជា។

នេះបើតាមការចេញផ្សាយរបស់ អង្គការសមាគមអភិរក្សសត្វព្រៃ ហៅកាត់ថា (WCS) នៅថ្ងៃទី២៧ ខែកក្កដា ឆ្នាំ២០១៧។
លោក ឈម ឈួម អ្នកការពារសម្បុកសត្វត្រដក់ធំ នៅតំបន់ រ៉ាមសារ ព្រែកទាល់ បានសម្ដែងការរីករាយ ក្នុងការជួយអភិរក្សសត្វស្លាបដ៏កម្រនេះ ពិសេសសត្វត្រដក់ធំ និង សត្វស្លាបគ្រប់ប្រភេទធ្វើការពងកូន នៅទីនោះប្រកបដោយសុវត្ថិភាព។
លោកបាន បន្ថែមថា បច្ចុប្បន្ននេះ ប្រជាសហគមន៍នៅក្នុងតំបន់នេះ មានការយល់ដឹងអំពីតម្លៃនៃការ អភិរក្សសត្វស្លាបទឹក ពិសេសសត្វស្លាបទឹកទាំងអស់នោះ បានផ្ដល់នូវប្រាក់ចំណូលតាម រយៈគម្រោងទេសចរណ៍ធម្មជាតិ។
លោក ស៊ុន វិសាល ប្រធានផ្នែកកម្មវិធីពិនិត្យអង្កេតតាមដាន និងសិក្សាស្រាវជ្រាវ សត្វស្លាបទឹកនៃក្រសួង បរិស្ថានបានលើកឡើងថា តំបន់ព្រែកទាល់គឺជាទីជម្រក សត្វស្លាបទឹករស់នៅ ដែលមានប្រមាណ ជាង១៣០ប្រភេទ និងកំពុងមានវត្ដមានពងកូន។ លោកបានសំណូមពរដល់ប្រជាពលរដ្ឋ សហគមន៍ និងអាជ្ញាធរគ្រប់លំដាប់ថ្នាក់ បន្ដកិច្ចសហប្រតិបត្ដិការ និងគាំទ្រសកម្មភាពអភិរក្សនៅតំបន់ព្រែកទាល់ ដើម្បីការពារសត្វ ស្លាបទឹកសំខាន់ៗ និងទីជម្រកធម្មជាតិរបស់សត្វស្លាបកុំឱ្យបាត់បង់។

អង្គការសមាគមអភិរក្សសត្វព្រៃ WCS បានឱ្យដឹងថា សម្បុកត្រដក់ធំទាំងអស់នោះ ទទួលបានការការពារ យ៉ាងល្អសម្រាប់រយៈពេល៦ខែកន្លងទៅនេះ ពីសំណាក់ក្រុមមន្ត្រី ឧទ្យានុរក្សរបស់ក្រសួងបរិស្ថាន ប្រជាជនរស់នៅភូមិព្រែកទាល់ និងអង្គការ សមាគម អភិរក្សសត្វព្រៃ WCS ។
ត្រដក់ធំ គឺជាប្រភេទត្រដក់មានមាឌធំជាងគេ បង្អស់ និងមាន កម្ពស់ រហូតដល់១,៥ម៉ែត្រ។ ពួកវាស្ថិតនៅក្នុងបញ្ជីក្រហមរបស់អង្គការ IUCN ជាប្រភេទ រងគ្រោះជិត ផុតពូជនៅលើសកលលោក។
សូមបញ្ជាក់ថា សព្វថ្ងៃនេះ សត្វត្រដក់ធំពេញវ័យចំនួន៨០០ទៅ១០០០ ក្បាលប៉ុណ្ណោះ កំពុងរស់នៅលើ ពិភពលោក។ ក្នុងនោះ សត្វត្រដក់ធំចំនួន១៥០ទៅ២០០គូ រស់នៅក្នុងតំបន់រ៉ាមសារ ព្រែក ទាល់ដែលជាបន្ទាយពងកូនចុងក្រោយ គេបង្អស់សម្រាប់តំបន់អាស៊ីអាគ្នេយ៍៕
ប្រភព៖ dailyreport

បុគ្គលជោគជ័យតែងធ្វើរឿង ៩ យ៉ាង មុនគេង

ចំណេះដឹង No comments

បុគ្គលជោគជ័យតែងចាត់ទុកសុខភាពជាកត្តាចម្បងបំផុតសម្រាប់ជីវិតរបស់ខ្លួន។ ការទទួលទានដំណេកគ្រប់គ្រាន់គឺជាចំណែកមួយដ៏សំខាន់សម្រាប់សុខភាពផ្លូវការនិងផ្លូវចិត្ត។ ហេតុនេះ ទម្លាប់នៃការទទួលទានដំណេកគឺជាកត្តាគន្លឹះ។ មនុស្សភាគច្រើនជ្រើសរើសយកការអានសៀវភៅជាកិច្ចការចុងក្រោយបំផុតមុននឹងចូលគេង។ ខាងក្រោមនេះ គឺជាទម្លាប់ ៩ យ៉ាងដែលបុគ្គលជោគជ័យតែងធ្វើមុនពេលចូលគេង៖

១. អានសៀវភៅ ៖ អ្នកជំនាញបានអះអាងដូចៗគ្នាថា កិច្ចការចុងក្រោយបង្អស់ដែលបុគ្គលជោគជ័យធ្វើមុនគេង គឺអានសៀវភៅ។

២. ធ្វើបញ្ជីកិច្ចការដែលត្រូវធ្វើបន្ត៖ ស្ងប់ចិត្តគឺជាប្រការសំខាន់បំផុតដែលនាំឲ្យគេគេងលក់ស្កប់។ ហេតុនេះ ការធ្វើបញ្ជីកិច្ចការដែលមិនទាន់បានបញ្ចប់ដែលនឹងត្រូវធ្វើបន្តនៅថ្ងៃក្រោយ គឺជាកត្តាល្អមួយដើម្បីឲ្យចិត្តជ្រះស្រឡះ។

៣. ចំណាយពេលជាមួយក្រុមគ្រួសារ៖ ប្រការសំខាន់មួយដែលគេគួរធ្វើមុនពេលគេង គឺចំណាយពេលវេលាជាមួយប្តី ប្រពន្ធ ឬលេងជាមួយកូន ឬសត្វចិញ្ចឹម។ នេះជាវិធីមួយដ៏ប្រសើរក្នុងការបង្កើនទំនាក់ទំនងក្នុងគ្រួសារ និងចែករំលែកបទពិសោធន៍ប្រចាំថ្ងៃ។

៤. ពិចារណាកិច្ចការដែលបានធ្វើកន្លងមកហើយ ឬសរសេរនូវរឿងរ៉ាវល្អៗបី បួនយ៉ាង ដែលជួួយលើកទឹកចិត្តឲ្យកាន់តែប្រសើរឡើង។

៥. សមាធិ៖ បុគ្គលជោគជ័យជាច្រើន ធ្វើសមាធិ ១០ នាទីមុនគេង។

៦. ផ្តល់អាទិភាពដល់ការគេងគ្រប់គ្រាន់៖ ដោយសារភាពមមាញឹកក្នុងមុខរបរមនុស្សមួយចំនួន មិនបានទទួលទានដំណេកគ្រប់គ្រាន់ទេ។ សម្រាប់បុគ្គលជោគជ័យ គេតែងចាត់អាទិភាពឲ្យការគេង និងគេងឲ្យបានគ្រប់គ្រាន់ជានិច្ច។

៧. ដកខ្លួនឲ្យផុតពីការងារ៖ បុគ្គលជោគជ័យមិនធ្វើការងារមុនគេងទេ។ ពួកគេមិនបើកអ៊ីម៉ែល ឬព្យាយាមមិនពាក់ព័ន្ធជាមួយការងារមុនពេលគេងទេ។

៨. បង្កើតគំនិតវិជ្ជមាន៖ ទោះបីជួបរឿងអវិជ្ជមាននៅពេលថ្ងៃច្រើនយ៉ាងណាក៏ដោយ បុគ្គលជោគជ័យតែងកាត់ផ្តាច់ខ្លួនចេញពីគំនិតអវិជ្ជមានទាំងនោះ និងបង្កើតគំនិតវិជ្ជមានជំនួសវិញ។

៩. នឹកដល់ជោគជ័យថ្ងៃស្អែក

ប្រភព៖ salarean.com

ពិន័យបុគ្គលិកឲ្យផឹកទឹកបង្គន់ នៅតែព្រមផឹកទៀត

ព័ត៌មាន No comments

ចិន៖ រូបភាពនិងវីដេអូឃ្លីបបែកធ្លាយ របស់ក្រុមហ៊ុនចិនមួយ កំពុងទទួលរងការរិះគន់យ៉ាងខ្លាំង ដោយសារក្រុមហ៊ុនមួយនេះ បានដាក់ពិន័យបុគ្គលិករបស់ខ្លួន ឲ្យផឹកទឹកបង្គន់គួរឲ្យខ្ពើមរអើម។
បុគ្គលិកប្រុសមិនស្គាល់អត្តសញ្ញាណម្នាក់ បានអង្គុយដងទឹកក្នុងចានបង្គន់ រួចឈរសម្លឹងមើលអស់ប៉ុន្មាននាទី មុនពេលដាច់ចិត្តផឹក។

រីឯនារីជាបុគ្គលិកម្នាក់ទៀត ក៏បានឈរសម្លឹងមើលទឹករបស់នាង ទាំងស្ទាក់ស្ទើរក្នុងចិត្តដូចគ្នា មុនពេលដែលនាងសម្រេចចិត្តផឹកទឹកបង្គន់នោះ។
យោងតាមប្រភពសារព័ត៌មាន Beijing News បានរាយការណ៍ថា បុគ្គលិកដែលរងការទទួលពិន័យខាងលើ គឺបម្រើការនៅហាងស្ទូឌីយោថតរូបមួយកន្លែង ស្ថិតក្នុងទីក្រុង Guang’an ខេត្តស៊ីឈួន ប្រទេសចិន។ មូលហេតុដោយសារបុគ្គលិកខាងលើ ខ្វះការយកចិត្តទុកដាក់លើការងាររបស់ពួកគេ និងមិនបំពេញការងារឲ្យបានពេញលេញ តាមគោលការណ៍ក្រុមហ៊ុនចង់បាន ហើយបើមិនធ្វើតាមការដាក់ពិន័យយ៉ាងដូច្នេះទេ ពួកគេនឹងត្រូវបណ្តេញចេញពីការងារ។

បុគ្គលិកស្រីម្នាក់ក្នុងចំណោមបុគ្គលិកផ្សេងទៀត ត្រូវបានរងពិន័យទាំងអស់ បាននិយាយថា នាងមានអាការរាគរូសយ៉ាងខ្លាំង បន្ទាប់ពីបានផឹកទឹកបង្គន់នោះរួច ហើយថែមទាំងលេបបាយមិនចូលទៀតផង។
ដំបូងឡើយវីដេអូឃ្លីបនេះ ត្រូវបានបង្ហោះចែកចាយដោយខាងបុគ្គលិកក្រុមហ៊ុន ចូលទៅក្នុងបណ្តាញសង្គម WeChat របស់ចិន សម្រាប់តែក្នុងក្រុម (Group) របស់ពួកគេប៉ុណ្ណោះ។ ប៉ុន្តែក្រោយមកស្រាប់តែត្រូវបានបែកធ្លាយ បង្ហោះចែកចាយពាសពេញបណ្តាញសង្គមទាំងមូល បង្កឲ្យមានការភ្ញាក់ផ្អើល និងរិះគន់តែម្តង។
អ្នកគ្រប់គ្រងមិនត្រូវបានគេបង្ហាញអត្តសញ្ញាណម្នាក់ នៅខាងក្រុមហ៊ុនស្ទូឌីយ៉ូថតរូបខាងលើនោះ បានចេញមុខអះអាងថា វីដេអូឃ្លីបនេះមិនត្រូវបានថតឡើងនៅក្នុងក្រុមហ៊ុនរបស់លោកទេ។ ប៉ុន្តែផ្ទុយទៅវិញវាគ្រាន់តែជាការថតបង្ហោះបែបលេងសើចមួយ ចូលទៅក្នុងក្រុម (Group) ការងាររបស់ពួកគេលើបណ្តាញសង្គម ដើម្បីជាផ្នែកមួយដាស់ស្មារតី និងជួយជំរុញលើកទឹកចិត្តដល់បុគ្គលិក ឲ្យខិតខំធ្វើការងាររបស់ពួកគេតែប៉ុណ្ណោះ។

ទោះបីជាយ៉ាងណា ទាក់ទងទៅនឹងករណីខាងលើនេះដែរ បច្ចុប្បន្នខាងសមត្ថកិច្ចជំនាញ កំពុងធ្វើការស៊ើបអង្កេតរកការពិតបន្ថែម ខណៈអ្នកដែលបានថតបង្ហោះចែកចាយនូវវីដេអូឃ្លីបនេះ ក៏ត្រូវបានប៉ូលិសក្នុងតំបន់ ចុះធ្វើការឃាត់ខ្លួន និងឃុំខ្លួនទុករយៈពេល៤ថ្ងៃផងដែរ៕

ប្រភព៖ khmerload

១០. បឹង Brosno (ប្រទេសរុស្ស៊ី)

៩. បឹង Hillier (ប្រទេសអូស្ត្រាលី)

៨. បឹង Kawah Ijen (ប្រទេសឥណ្ឌូនេស៊ី)

៧. បឹង Gafsa (ប្រទេសទុយនេស៊ី)

៦. បឹងទឹកពុះ (សាធារណរដ្ឋដូមីនិក)

៥. បឹង Nyos (ប្រទេសកាមេរ៉ូន)

៤. បឹង Michigan (សហរដ្ឋអាមេរិក)

៣. បឹងឆ្អឹងខ្មោច (ភ្នំហិម៉ាឡៃយ៉ា)

២. បឹង Kivu (នៅចន្លោះសាធារណរដ្ឋកុងហ្គោនិងរ្វ៉ាន់ដា)

១. បឹង Natron (ប្រទេសតង់ហ្សានី)

Featured Post

BTemplates.com

Blog Archive

Pages

About Me

Total Pageviews

Find Us On Facebook

Translate

Labels

Followers

Popular

Labels